आज रातीबाट क्लिन फिड लागू हुँदै, नेपालमा चल्ने छैनन् १८० बढी यी टिभी च्यानल

  हल्कारान्यूज  576 पटक हेरिएको

काठमाडौं । आज (शुक्रबार) मध्यरातीपछि नेपालमा प्रसारण हुने विदेशी टेलिभिजनमा क्लिन फिड लागू हुने भएको छ। क्लिन फिड लागू भएसँगै आज रातीदेखि बीबीसीदेखि भारतीय न्यूज च्यानलहरु, फूटबल, क्रिकेट, कार्टून च्यानललगायत १८० भन्दा बढी विदेशी च्यानलहरु नेपालमा बन्द हुने भएका छन्।

सूचना तथा सञ्चार प्रविधि मन्त्रालयले बिहीबार सूचना जारी गर्दै कात्तिक ८ गतेदेखि विदेशी च्यानल क्लिन फिड (विज्ञापनमुक्त) हुनैपर्ने बताएको छ। ‘विज्ञापन नियमन गर्ने सम्बन्धमा व्यवस्था गर्न बनेको ऐन २०७६’ विदेशी टेलिभिजन च्यानललाई कार्तिक ७ गतेसम्म क्लिन फिड भइसक्नुपर्छ।

भारतीय ब्रोडकाष्टर्स फोरम, डिस्कभरी नेटवर्क्स, बीबीसी न्युज, नेपाल केबल टेलिभिजन महासंघ जस्ता संघसंस्थाबाट क्लिन फिड प्रसारणको म्याद थप्न माग गरे पनि सरकारले अस्वीकार गरेको छ। क्लिनफिडसहित च्यानल प्रसारण नभएमा कानून बमोजिम हुने मन्त्रालयले बताएको छ।

कात्तिक ८ देखि विज्ञापन बजाएमा विदेशी च्यानल बन्द गर्ने कानुनी व्यवस्था छ। २०७५ कात्तिक ८ गते राजपत्रमा प्रकाशित ऐनले क्लिन फिडमा जान सेवा प्रदायकहरूलाई एक वर्ष समय दिएको थियो।

ऐनमा भनिएको छ, ‘ऐन प्रारम्भ हुँदाको बखतमा विदेशी च्यानलसँग डाउनलिङ्क गरी प्रसारण गर्न सम्झौता गरिसकेका संस्थाहरूले यस ऐन प्रारम्भ भएको एक वर्षभत्र विज्ञापनरहित प्रसारण गर्नुपर्नेछ।’

कुन–कुन च्यानल बन्द हुन्छन्?

आज मध्यरातीबाट नेपालमा ३२ वटा मात्रै विदेशी च्यानल प्रशारण हुनेछन्। प्याकेजमा किनिने र सित्तैमा बजाउन पाइने गरी करिब १८० भन्दा बढी च्यानलको प्रसारण तत्कालका लागि बन्द हुने नेपाल केवल टेलिभिजन महासंघका अध्यक्ष सुधीर पराजुलीले बताए।

टेलिभिजन प्रसारकले प्याकेजमा किन्ने गरेको ९२ च्यानलमध्ये ६० वटा च्यानलले तत्कालै क्लिन फिड कन्टेन्ट दिन नसक्ने बताएका र कतिपयले तयारी गरे पनि पूरा गर्न सकेका छैनन्।

अध्यक्ष पराजुलीका अनुसार ‘जी’को १२ वटा र सोनीको ८ वटा च्यानल क्लिन फिडसहित भोलिको मध्यरातबाटै प्रसारण हुनेछन्। तर, कार्टुनका च्यानल, बीबीसी अलजजिरा, स्टार्स र कलर्स प्याकेजका च्यानलहरु तत्कालै नेपालमा प्रसारण नहुने भएका छन्।

२० वटा विदेशी च्यानलले क्लिनफिडको सबै तयारी सकाएको र ‘जी’का १२ वटा च्यानलले भोलिसम्म सबै तयारी सकाउने जानकारी आएको पराजुलीले बताए। पराजुलीले बताए अनुसार अब आज रातीबाटै फुटबल र क्रिकेटका च्यानलहरु पनि नेपालमा बन्द हुनेछन्। त्यसो हुनुमा त्यस्ता च्यानलहरुले क्लिन फिड गर्न समय माग्दा सरकारले नदिएकोले अब केही समय ३२ वटा विदेशी च्यानलमा ग्राहकले चित्त पर्ने अवस्था आएको छ।

पैसा तिरेर किनिने प्याकज बाहेकका ‘फ्रि टु एयर’मा सित्तैमा उपलब्ध हुने १२० वटा च्यानल पनि भोलि मध्यरातबाटै बन्द हुने पराजुलीले बताए। ‘स्टार्स र कलर्सका क्लिन फिड गर्ने बक्स सिंगापुरमा आइपुगेर अड्किएको छ,’ उनले भने,’उनीहरुले कहिलेबाट क्लिन फिड प्रविधि जडानको काम सकाउँछन् भन्ने पक्का भएको छैन।’

नेपालमा भारतीय न्युज च्यानलमध्ये अब ‘जी न्युज’ मात्रै बज्ने छ। अन्य न्युज च्यानलले नेपालमा क्लिन फिडसहित प्रसारण गर्न चाहेका छैनन्। न्युज च्यानलका स्क्रिनका विभिन्न भागमा विज्ञापनहरू राखिने र विज्ञापन गर्ने समय पनि यकिन नहुने भएकाले न्युज च्यानलमा क्लिन फिड गर्न असहज छ।

प्रत्यक्ष प्रसारणका बेलामा विज्ञापन हुने समय निश्चित नहुने भएकाले क्लिन फिडले खेलकुद च्यानलहरूको प्रत्यक्ष प्रसारणमा पनि समस्या पर्नसक्ने देखिएको छ। तर, खेलकुद च्यानललाई व्यवस्थापन गर्ने भारतीय प्रसारकहरूले आश्वासन दिएका छन्। भारतीय प्रसारकले नेपालमै क्लिन फिड गर्ने भएपछि अब विज्ञापन बज्ने समयमा स्क्रिन खाली देखिनेछ। त्यो समयमा नेपालकै विज्ञापन राख्न पाउनुपर्ने नेपाली टेलिभिजन सेवा प्रदायकहरूले माग गरेका छन्।

तर, संसदको विकास तथा प्रविधि समितिले नेपाली टेलिभिजनलाई प्रवर्द्धन गर्नुपर्ने भन्दै क्लिन फिड गरिएका विदेशी च्यानलमा नेपालको विज्ञापन बजाउन नपाउने प्रबन्ध गर्न निर्देशन दिएको छ।

तपाईको प्रतिक्रिया

सम्बन्धित समाचार