31 पटक हेरिएको 
काठमाडौं । राष्ट्रपतिमा राष्ट्रिय सहमति गर्ने भन्दै आएका प्रधानमन्त्री प्रचण्डले नेपाली कांग्रेसको उम्मेदवारलाई समर्थन गर्ने निर्णय गरेका छन्।
सरकारको नेतृत्व गरिरहेको माओवादी केन्द्र र प्रतिपक्षमा रहेका नेपाली कांग्रेससहितका ८ दलले नयाँ गठबन्धन बनाउँदै राष्ट्रपतिमा कांग्रेस उम्मेदवारलाई समर्थन गर्ने निर्णय गरेका हुन्।
शुक्रबार साँझ बसेको ८ दलको बैठकमा प्रधानमन्त्री प्रचण्डले संसदको सबैभन्दा ठूलो दल कांग्रेसलाई राष्ट्रपतिको चुनावमा समर्थन गर्ने प्रस्ताव राखेका थिए। यो नयाँ राजनीतिक यात्रा सुरुवात हुने उनको तर्क थियो।
प्रचण्डको प्रस्तावमा माओवादी, जनता समाजवादी पार्टी, नेकपा एकीकृत समाजवादी, जनमत पार्टी, लोकतान्त्रिक समाजवादी पार्टी, नागरिक उन्मुक्ति र राष्ट्रिय जनमोर्चाले समर्थन गरेका छन्।
एकीकृत समाजवादीका प्रमुख सचेतक प्रकाश ज्वाला भन्छन्, ‘राष्ट्रपतिको निर्वाचनमा नेपाली कांग्रेसको उम्मेदवारलाई समर्थन गर्ने टुंगो लागेको छ। उम्मेदवारका सन्दर्भमा कांग्रेसले निर्णय गर्छ।’
हाल सरकारमा रहेका दल नेकपा (एमाले), राप्रपा र सरकारको समर्थन गरेकाे राष्ट्रिय स्वतन्त्र पार्टी भने नयाँ गठबन्धनमा सहभागी भएका छैनन्।
